Tag: Salary

လေ့လာဖူးတာတစ်ခုပြောပြမယ်။ နဲနဲတော့ ရှည်တယ် ဖတ်ချင်ရင်လဲ ဖတ်ပေါ့။လေ့လာဖူးတာလို့ပြောတာက ကိုယ်ပိုင် idea မဟုတ်ဘူးဆိုတာကို အသိပေးတာ။ ပြောရမယ်ဆိုရင် A. Devadason ဆိုတဲ့ လူတစ်ယောက်ပြောပြတာကို ကြားဖူးပြီးမှတ်သားထားတာပါ။ ဒါပေမယ့် ဒီ idea ကို ကြိုက်လို့ ပြန်မျှဝေချင်ပါတယ်။ ဒီ idea က လခစာ သမားတွေအတွက် ရည်ရွယ်ပါတယ်။ လုပ်ငန်းရှိတဲ့သူတွေကတော့ ဒါတွေကို အနည်းနဲ့အများ သိကျွမ်းနေပြီးသား ဖြစ်နိုင်ပါတယ်။အရင်က ပြောဖူးတယ်။ အဆင်မပြေဖြစ်လာနိုင်တဲ့ ကာလတွေကိုကျော်ဖြတ်ဖို့ လက်ထဲမှာ အနည်းဆုံး တစ်လတစ်လ ကုန်ကျငွေရဲ့ (၆) ဆ လောက် ထားရမယ်လို့ပြောခဲ့ဖူးတယ်။ ဒီလိုပဲလေ့လာဖူးတာကို။ ဒါပေမယ့် အခုကြုံနေရတဲ့ အကြပ်အတည်းကာလရဲ့ အတွေ့အကြုံအရ ဒီ (၆) လစာက အနိုင်နိုင်ပါ။ ဒါပေမယ့် မရှိတာထက်တော့ တော်သေးတာပေါ့။အခုပြောပြမှာကတော့ ကိုယ့်ရဲ့ တစ်လတာ ဝင်ငွေကို ဘယ်လို သုံးစွဲမလဲဆိုတာပါပဲ။လခစားသမား အတော်များများက paycheque to paycheque အသက်ရှင်နေရတာများပါတယ်။ ဆိုလိုတာက လစာထုတ်ပြီဆိုတာနဲ့ ပေးစရာတွေ ပေးလိုက်ရတာနဲ့ လက်ထဲမှာ သိပ်မကျန်တော့ဘူး။ လိုအပ်လာတဲ့ ချေးငှါးပြီးသုံးရတယ်။ ပြီးတော့ ပြန်ဆပ်နိုင်ဖို့ နောက်လ လစာကိုမျှော်ရပြန်တယ်။ ဒီလိုနဲ့ပဲ လုံလည်ချာလည်လိုက်နေရတာများပါတယ်။ဒီတော့ ရသမျှလစာငွေကို စုဆောင်းပါလို့ အလွယ်တကူမပြောချင်ပါဘူး။ ဖြစ်မှ မဖြစ်နိုင်တာလေ။ တစ်လတစ်လ ကုန်စရာတွေက သောက်သောက်လဲ မဟုတ်ဘူးလား။ သုံးစရာတွေကြီးပါပဲ။ လစာရတာနဲ့ ကုန်ဖို့ဆီကိုပဲဦးတည်နေတော့တာပဲ မဟုတ်ဘူးလား။ ဒါပေမယ့် paycheque to paycheque အသက်ရှင်နေရတဲ့ ဘဝကနေလဲ လွတ်မြောက်စေချင်တယ်။ ဒီတော့ ဘယ်လိုစုဆောင်းမှာလဲဆိုတာကို ပြောပြချင်တာပါ။အဓိက ကတော့ လကုန်လို့ ဝင်ငွေရလာတဲ့အခါမှာ ကန့်သတ်မှုတွေကို စလုပ်ရပါလိမ့်မယ်။ အဲ့ဒါက 70/30 rule ပါပဲ။၁။ ကိုယ့်ရဲ့ တစ်လတာ ကုန်ကျစရိတ်တွေ၊ အသုံးစရိတ်တွေ အားလုံးအတွက် ကိုယ့်လစာရဲ့ ၇၀ ရာခိုင်နှုန်းအတွင်းမှာပဲ ရှိနေအောင် ကန့်သတ်ရပါလိမ့်မယ်။ အဲ့ဒါထက် ပိုသုံးချင်ရင် ပိုရှာဖို့ပဲ ဖြစ်ပါတယ်။ ပြောချင်တာက ကိုယ်လစငွေရဲ့ ၇၀ ရာခိုင်းနှုန်းကိုပဲ သုံးခွင့်ပြုပါ။၂။ ကျန်တဲ့ ၃၀ ရာခိုင်နှုန်းကိုတော့ စုဆောင်းပါ။ စုဆောင်းပါလို့ပြောလိုက်လိုက်လို့ ရည်ရွယ်ချက်မရှိ စုဆောင်းတာမျိုးကို ဆိုလိုတာ မဟုတ်ပါဘူး။အခုစုဖို့ပြောတဲ့ ၃၀ ရာခိုင်နှုန်းကို သုံးပုံပုံလိုက်ပါ။ပထမ တစ်ပုံကို အရေးပေါ်လိုအပ်ရင်သုံးဖို့ အရန်ငွေအဖြစ် စုဆောင်းပါ။ ဟုတ်တယ်လေ အရေးပေါ်ကိစ္စဆိုတာ ပုံစံအမျိုးမျိုးနဲ့ ကိုယ့်ဆီရောက်လာနိုင်တယ်။ အဲ့ဒီ့ အချိန်မှာ လက်ထဲမှာ အရန်ငွေမရှိဘူးဆိုရင် အတော် ဒုက္ခများတယ်ဆိုတာ ကြုံဖူးသူတိုင်း သိကြမှာပါ။ကဲ နောက်ထပ် တစ်ပုံကိုတော့ ကိုယ်သုံးချင်တာတွေကို သုံးနိုင်ဖို့အတွက် စုဆောင်းရမှာဖြစ်ချင်တယ်။ အမြဲတမ်း လိုအပ်တာတွေအတွက်ပဲ ပိုက်ဆံကိုချန်ထားပြီး ကိုယ်လိုချင်တဲ့ အရာကိစ္စတွေအတွက် ဘာမှမရှိဘူးဆိုရင် ဘဝကြီးက အတော် အဆင်မပြေဖြစ်နိုင်ပါတယ်။ သူများတွေလို ခရီးလေးဘာလေးထွက်ချင်တာတွေရှိနိုင်မယ်၊ ဖုန်းအသစ်လေးတွေ ဝယ်ချင်တာတွေရှိနိုင်ပါတယ်။ ဒီအရာတွေအတွက် ဒီတစ်ပုံကို စုဆောင်းပြီး သုံးစွဲပါ။ ပြောချင်တာက လိုချင်တာတွေကို ချေးငှါးပြီး မသုံးပါနဲ့ ဒီတစ်ပုံကနေ စုဆောင်းပြီးသုံးပါ။နောက်ဆုံတစ်ပုံကတော့ ကိုယ့်ရဲ့ ဥစ္စာဓန ကြွယ်ဝလာဖို့အတွက် စုဆောင်းပါ။ လူတွေပြောတဲ့ အပိုဝင်ငွေ ဒါမှမဟုတ် passive income ဆိုတာကို ရလာဖို့ဆိုတာ လက်ဗလာ နဲ့ မရနိုင်ဘူးလေ။ ဒီတော့ ဒီ တစ်ပုံကို အသေအချာစုဆောင်းပြီး ငွေကြေးပမာဏ တစ်ခုကိုရလာတဲ့အခါမှာ အကျိုးရှိမယ့် နေရာတစ်ခုခုမှာ ရင်းနှီးမြုတ်နှံပါ။ ဒီလိုမှ မစုရင် ဘယ်လိုလုပ် passive income တစ်ခုကို စတင်နိုင်မှာလဲ။ စိတ်ကူးမယဉ်ဘဲ လက်တွေ့ဆန်ရမယ်လေ။ကဲ၊ ဒီတော့ အခုဆိုရင် လခစားသမားတစ်ယောက်ဟာ ကိုယ့်ဘဝအတွက် ကိုယ့်ရဲ့ ဝင်ငွေတွေကို ဘယ်လို စီမံသင့်သလဲ ဆိုတာကို အကြံတစ်ခုတော့ ရသွားလောက်ပါပြီ။ တစ်ခုပဲရှိတယ်။ ဒီ အကြံကို ကိုယ့်အတွက် အကျိုးရှိအောင် လက်တွေ့ စမ်းကြည့်ပါ။ သူများအပြောမှာပဲ ကျေနပ်ပြီး ကိုယ့်အတွက် မဟုတ်တာမျိုး မဖြစ်ပါစေနဲ့။ဒီတော့ အခုပဲ ကိုယ့်ဝင်ငွေကို 70% 10% 10% 10% ခွဲခြမ်းလိုက်ပါ။- 70% အသုံးစရိတ်- 10% အရေးပေါ်အရန်ငွေအဖြစ်စု- 10% သုံးချင်တာသုံးဖို့စု- 10% အရင်းအနှီးရဖို့စု